Cares mitans y cari mituns
dessigü s‘ëis bele intenü tan atramënter che tröp é chëst ann. Ince la festa de San Micurá ai 6 de dezëmber sará atramënter. Mo i podun pa bëgn impó la festejé y chiló essi na bona idea …
Ma de püc sanc vëgnel cunté tan de stories sciöche de San Micurá. Chiló te Südtirol él encër cincanta dlijies dedicades a chësc sant. Pól ester che i ne n conescëise ince os öna o l’atra? La jënt â na gran ligrëza cun San Micurá, porchël cuntunse ince incö ciamó de d’ël. Les stories nes cunta che al ti orô bun ala jënt, che al la daidâ indlunch olache al sciafiâ. Al â en gran cör, dantadöt por chi che ê tla meseria y ti fistidi. Al á porvé da odëi te döt le bun y da fá instës ince dl bëgn!
I sanc é porsones, che é bones da nes fá sintí Chël Bel Dî te na manira dër particolara. Y da sintí Chël Bel Dî ne mëssel pa nët nia ester de gran mirachi, mo al basta de pici sëgns fac cun amur. Na storia cunta che san Micurá passâ vign’ann, la sëra dan so compliagn fora por cité y ti metô scincundes a mituns dala meseria dan porta. Ma insciö. De te sëgns sunse bëgn düc nos bugn da capí zënza gran spligaziuns. Ai nes dij: Bel che tö es al monn! Zënza te ne foss mia vita nia tan bela! Dilan! Al n’ó nia ester tröp, sce al vëgn dal cör.
„I sun düc Micurá!“
Propi chëst ann pó la festa de San Micurá nes recordé da odëi dantadöt le bun sciöche San Micurá. Al é important che i nes dijunse y nes mostrunse tres indo un al ater: I t’ó bun! Tö es por me prezius/a! I speri che ara te vais bun! I sun chiló por te! Savëise ci proposta che i oress porchël ves fá? Nos düc sun chëst ann San Micurá!
Sciöche San Micurá podunse ince nos se damané: A che poi pa ti fá dl bëgn? Magari te mia familia, cun na buna parora o en pice sëgn? O magari poi ti fá a zacai na picia ligrëza sce ara ne ti vá te chësc tëmp nia tan bun? Ince chërdé sö zacai o n pice messaje pó fá ligrëza. Al é pa bëgn tröc sëgns che an pó fá, ince te chësc tëmp. Insciö sarunse düc un por l’ater San Micurá! Insciö vëgnel fat de bëgn ince tres nos!
Sciöche vësco ái ince iö ligrëza cun San Micurá. Al é por me sciöche vësco n gran sant y compagn. Al me dëida recordé, me y nos düc, ci che al ó dí ester cristiagn: che i imparunse da Gejú, che i nes daidunse un cun l‘ater, che i scincunse inant speranza y che i ti dijunse a düc: Chël Bel Dî é dlungia nos, al nes ó bun!
Prësc él Nadé
La festa de San Micurá nes dij: Ara ne döra nia plü dî spo él Nadé. Dailó festejunse le compliagn de Gejú. Al é döt de Chël Bel Dî y döt nost. Al é gnü n möt, insciö sciöche os sëis sëgn. Al ó nes acompagné por döta la vita. Tan important é Nadé. Tan bel é ci che nos cherdun!
Che Gejú ves benedësces, os, üsc geniturs, neni, fredesc y sorus y düc chi che i ti orëis bun, por interzesciun dl vësco sant, San Micurá
Osc Vësco
+ Ivo
2. domënia d’Advënt, festa de San Micurá, ai 6 de dezëmber 2020
