Pellegrinaggio dei ladini

Cari pelegrins de Jenn,al é sen dui dis ch’i sëis pies ia da ciasa, ch’i sëis sön tru por gni chiló sön cösc crëp sant de Jenn en prozesciun. Al fej na gran impresciun, odëi tan de ëi co prëia y cianta – y co mostra ensciö la fede te nosc Signur Geju Crist inanter nos.Al mo fej en gran plajëi da ester ince iö sëng inanter os desco pelegrin. Al mo fej en gran plajëi ch’i a podü fà en to de tru adöm con os, ch’i m’ëis lascè tó pert a osc perié y cianté, ch’i testimoniun deboriada nosta fede.En momënt dër sintí èl stè en sëra canche la prozesciun é roada a San Pire de Funes. Al è ste en momënt dër emozional, olá ch’i an podü ciamo en iade sintí la gran forza dla fede te Geju Crist, chëra co nes lieia adöm y nes fej sintí fis de Di. Ince a me sciöche osc vësco mo fejel bun perié y cianté adöm con tan de ëi. Al dà forza testimonié con tan de ëi nosta fede.Y encö sëise roes a bona destinaziun de osc pelegrinaje, i sëis söl crep sant de Jenn. En bel momënt, en gran momënt por nos düc canc. I pënsi ch’i sëise stanc, mo ince contënc y plëgns de ligrëza! Ji en Jenn á ince so prisc, mo porchël ince söa gran valüta y so mirit.Jenn è en post particolar por nos cristians. Da chiló è piada ia nosta fede co á arjunt nüsc paîsc y sambëgn ince osta bela Val Badia.Sc’i gnun en pelegrinaje en Jenn orunse sambëgn ringrazié sora döt por la gran scincunda dla fede cristiana. I ringraziun ch’i conesciun Geju Crist y söa bona noela, co a porté tan de confort y lominus tal monn.I se recordun ince dla responsabilité ch’i ùn da vire con convinziun do i valurs cristians. Portede entres da nö ete te ostes families la bona noela de Geju Crist, mostredi a üsc mituns, a osta fomena, a üsc familiars y amisc, tan bel ch’al è da crëie te n Bel Di co s’o tan bun.I sun abiná chiló tla dlijia dla Santa Crusc de Jenn. Le sëgn zentral de nosta fede cristiana – la crusc de nosc Signur.La crusc co ê en sëgn de violënza y de na mort crödia è gnüde tres Geju Crist sëgn de salvëza y d’amur. Ensciö podun ciaré sö a Geju Crist sön la crusc y ël se ciara a nos con gran amur. Chësc amur nes da tres endo forza da jì nosc tru, da se convertí y meter man da nö, da ti ji do ad ël co nes va danfora. Ël nes mostra le der tru co porta a la contentëza y a la felizité. San Paul nes dij: nos cristians y i cristians de düc i tomps po ciafé tla crusc forza y salvëza por la vita y por le monn.La crusc resta sambëgn ince en mistero. Vignun de nos conësc ince la pert scöra y posocia dla crusc. Val iade tóchera da porté la crusc, y i ne sun nia bogn da la scassé jö. Te chi momënc de soferënza se augüri, chi podëise sinti, che Ël ne se lascia nia susc. Al è Ël co porta con os, al è Ël co patësc con os.Encö el propi en dé particolar – al è la festa dal Cör de Geju. Ci bela ocajiun y ci bel momënt da ti fa festa a Geju Crist. Sce an pënsa al cör, spo pënson al zënter, al plü sot dla porsona. Le cör è segn d’amur. I dijun pö: te mo stas a cör, i feji val con cör, i dauriun nosc cör a valgügn, che o di testimonié l’amur! L’amur de Gejù Crist, l’amur dla crusc. Y cun so amur el inanter nos, sciöche al nes à impormetü. Mo i messun tres indo le chirì. - Ji en pelegrinaje o pö di: Geju, i o te chirí, i o che te fejes pert de mia vita – de nosta vita.Deboriada ëise cianté te chisc dis:Cör de Gejù, t’es mia salvëzaI t’o bun t’es mi gran bëgn.T’es le füch che tres me scialdaY söl tru dl bëgn me tëgn. Cör de Gejù, t’es mia speranzach’i arjunji l’paraisc.Gnü daurì est’ dala lanzasöla crusc por tü amisc. Sëgn sc‘i jëis indo demez da Jenn, tolesse para ci ch’i sintis chiló te üsc cörs. Tolesse con os tröpa forza y benedisciun a ciasa y cuntedi a osta jënt le Signur è cun nos.